Miðvikudaginn 18. júní kl. 21:00 - Miðaverð 2.500 krónur.
Miðafrátektir hér: https://forms.gle/W67kCytRtf66Qhi37

Dúettinn Huldumaður og víbrasjón sem skipaður er af Heklu Magnúsdóttur þeramínleikara og Sindra Frey Steinssyni gítarleikara mun leika úrval af sönglögum tónskáldsins Magnúsar Blöndal, sem er ef til vill þekktastur fyrir lagið Sveitin milli sanda og sem frumkvöðull í íslenskri raftónlist. Magnús samdi einnig fjölda fallegra sönglaga sem Hekla og Sindri túlka á nýjan hátt í tónleikaröðinni. Lögin, sem eru upphaflega samin í hefðbundnum stíl fyrir rödd og píanó, eru færð í rafmagnaðan búning.

Auk hins dularfulla og angurværa þeramíns sem túlkar söngröddina og gítarsins sem sér að mestu um undirleik, koma einnig við sögu þverflauta og lúppufetill í dadaíska dúettinum Na no mani. Þá er bassahljóðgervli stýrt af Sindra í nokkrum lögum með heimasmíðuðum bassapedala á sama tíma og hann leikur undir á gítar. Bassaþrællinn sem fékk nafnið Fótgönguliði var sérsmíðaður fyrir tónleikaferðalagið.

Húsið opnar kl. 20:30. Við hlökkum til að sjá ykkur!